Presidenti i Kroacisë, Zoran Milanoviq, ka cilësuar si “marrëzira” pretendimet se Kroacia, Shqipëria dhe Kosova po përgatiten të sulmojnë Serbinë, duke theksuar se këto narrativa dëmtojnë ndërtimin e marrëdhënieve normale dhe miqësore në rajon. Ai ka theksuar se Kroacia nuk e sheh askënd si armik dhe shpreson që as vetë nuk shihet si e tillë nga fqinjët, përveç atyre që përhapin dezinformata të tilla. Në fjalimin e tij gjatë shënimit të 35-vjetorit të Brigadës së Tretë Gardiste “Kune”, Milanoviq ka nënvizuar synimin e Kroacisë për të ndërtuar marrëdhënie paqësore dhe të qytetëruara me fqinjët në dobi të ndërsjellë. Ai gjithashtu ka theksuar rëndësinë e rregullimit të çështjeve të brendshme dhe përmirësimit të marrëdhënieve me Serbinë dhe Bosnje e Hercegovinën, duke përfshirë edhe statusin e popullit kroat në Bosnje e Hercegovinë, në një kohë kur rajoni përballet me sfida globale të paparashikueshme.