Ministria për Çështje Evropiane në Maqedoninë e Veriut organizoi një takim të nivelit të lartë për nisjen e Misionit Monitorues të Kornizës Investuese për Ballkanin Perëndimor (WBIF), ku u theksua rëndësia e zbatimit efikas të projekteve për të sjellë përfitime konkrete për qytetarët. Zëvendëskryeministri dhe Ministri Bekim Sali nënvizoi se suksesi nuk matet vetëm me sigurimin e financimit, por me realizimin e projekteve që përmirësojnë ekonominë dhe standardin e jetesës. Gjatë takimit u diskutuan sfidat kryesore në implementimin e projekteve infrastrukturore, duke përfshirë kapacitetet e njësive zbatuese, procedurat e prokurimit dhe koordinimin ndërinstitucional. Misioni do të vazhdojë me takime tematike dhe vizita në terren, duke synuar forcimin e mekanizmave të monitorimit dhe përshpejtimin e realizimit të projekteve strategjike që afrojnë Maqedoninë e Veriut me Bashkimin Evropian.