Ministria e Punëve të Jashtme e Maqedonisë së Veriut ka kërkuar sqarime nga Ambasada e Shqipërisë lidhur me ndalimin e hyrjes në pikën kufitare "Qafë Thanë" për tre zyrtarë maqedonas, përfshirë deputetin Bekim Qoku, deputetin Adnan Azizi dhe zv. sekretarin e përgjithshëm të Qeverisë, Hasim Murtezani. Ngjarja u bë publike pas njoftimit të deputetit Qoku, i cili deklaroi se ata nuk u lejuan të kalonin kufirin drejt Shqipërisë. Nga ana tjetër, Dogana e Shqipërisë ka bërë me dije se zyrtarët mund të kalonin lirshëm, por ata kanë preferuar të mos e bëjnë këtë dhe të kthehen. MPJ e Maqedonisë thekson se në frymën e marrëdhënieve miqësore dhe aleancës në NATO, është kërkuar informacion zyrtar për të sqaruar situatën dhe për të shmangur keqkuptimet mes dy vendeve.