Në Komunën e Graçanicës, e banuar kryesisht nga komuniteti serb, nuk u respektua festa zyrtare e Kurban Bajramit, pasi mësimi u zhvillua normalisht në shkollat me sistem paralel serb, ndryshe nga komunat e tjera ku mësimi u ndërpre. Edhe Posta në Graçanicë, e menaxhuar nga institucionet e Kosovës, funksionoi gjatë ditës së festës, duke ofruar shërbime për qytetarët. Ish-ministri Sadri Ferati e vlerëson këtë sjellje si një formë rezistence të komunitetit serb ndaj institucioneve të Kosovës, të cilat sipas tij, ende kanë lidhje me Serbinë. Ai shtoi se shteti ka toleruar këto veprime për shkak të ndjeshmërisë së situatës dhe për të shmangur tensione me Bashkësinë Ndërkombëtare.