Ministria e Punëve të Brendshme e Maqedonisë së Veriut u bën thirrje qytetarëve që të marrin me kohë dokumentet e tyre personale të përgatitura. Falë riorganizimit dhe rritjes së kapaciteteve, shërbimet administrative tani funksionojnë me efikasitet maksimal, duke ofruar termine të shpejta për fotografim dhe përgatitje të menjëhershme të dokumenteve. MPB thekson se periudha verore sjell rritje të frekuentimit për shkak të pushimeve dhe kthimit të bashkatdhetarëve nga diaspora, ndaj marrja në kohë e dokumenteve ndihmon në parandalimin e tollovive dhe radhëve të gjata. Qytetarët ftohen të kontrollojnë afatet e dokumenteve dhe t’i marrin ato sa më parë për të ruajtur ritmin e shpejtë të punës së shërbimeve administrative.