Ministri i Punëve të Jashtme dhe Tregtisë së Jashtme, Timço Mucunski, zhvilloi një takim me Ambasadorin e Bashkimit Evropian dhe ambasadorët e vendeve anëtare të BE-së, ku u shqyrtuan proceset politike dhe reformat aktuale në vend. Në fokus ishte progresi në përmbushjen e detyrimeve për hapjen e negociatave me BE-në, si dhe aktivitetet në kuadër të Axhendës së Reformave dhe integrimit evropian. Mucunski theksoi angazhimin e vendit për pajtueshmëri me Politikën e Përbashkët të Jashtme dhe të Sigurisë të BE-së, duke përfshirë mbështetjen për Ukrainën si një sinjal strategjik për anëtarësim të plotë. Gjatë takimit u diskutua gjithashtu nevoja për përshpejtimin e procesit të integrimit, forcimin e bashkëpunimit rajonal dhe mbështetjen e vazhdueshme nga vendet anëtare të Bashkimit Evropian.