Këshilli Gjyqësor në Maqedoninë e Veriut ka zgjedhur Zoran Gerasimovskin si ushtrues detyre të kryetarit të Gjykatës së Apelit në Shkup, pas emërimit të Meri Dikës në Gjykatën Kushtetuese. Për këtë pozitë ishin propozuar dy kandidatë, por u vendos që Gerasimovski të kryejë detyrën në mënyrë të përkohshme, ndërsa është shpallur konkurs për zgjedhjen e kryetarit të ri. Po ashtu, Këshilli vendosi pezullimin e funksionit gjyqësor të Meri Dikës dhe refuzoi kërkesën e gjyqtarit Vullnet Vinca për vazhdimin e punës pas moshës së pensionit, për shkak të mosrespektimit të afatit për dorëzimin e dokumentacionit. Në Gjykatën Themelore në Strugë, u zgjodh Nderim Polisi si ushtrues detyre i kryetarit, ndërsa po ashtu është shpallur konkurs për këtë pozicion. Në fund të seancës u formuan komisione për vlerësimin e procedurave për zgjedhjen e kryetarëve të dy gjykatave.