Nga Aeroporti “Adem Jashari” është nisur grupi i parë prej dhjetëra besimtarëve muslimanë nga Kosova drejt Mekës në Arabinë Saudite, për të kryer ritualin e haxhit, një nga pesë shtyllat e Islamit. Në total, gjatë ditëve në vijim do të udhëtojnë 1.576 besimtarë, shumica nga Prishtina dhe rrethina, të cilët u përshëndetën me familjarët e tyre plot emocione para nisjes. Imami Hakif Hoti, që udhëton për herë të 12-të dhe këtë vit si udhëheqës, thekson rëndësinë shpirtërore të haxhit dhe thotë se ky ritual i jep besimtarit ndjesinë e përjetimit të parë. Ndërsa Baki Imeri, që shkon për herë të gjashtë dhe këtë herë si bedel, fton të gjithë ata që kanë mundësi të mos e humbin këtë mundësi të veçantë, duke e konsideruar haxhin një nder të madh shpirtëror dhe material.