Kryeministri në detyrë i Kosovës, Albin Kurti, së bashku me zyrtarë të lartë nga Maqedonia e Veriut dhe drejtues të universitetit “Nënë Tereza”, vizituan punimet për ndërtimin e kampusit të ri universitar në Shkup. Ky projekt përbën investimin më të madh shtetëror në arsim në historinë e Maqedonisë së Veriut dhe një prej më të mëdhenjve që kanë përfituar ndonjëherë shqiptarët në këtë vend. Në fazën e parë do të investohen 40 milionë euro, ndërsa më pas edhe 20 milionë euro të tjera, duke krijuar kushte moderne për mbi 5,000 studentë dhe më shumë se 200 mësimdhënës. Kampusi do të ndërtohet në vendin ku dikur ndodhej kazerma e Armatës Popullore Jugosllave “Marshall Tito”, duke kthyer një hapësirë me histori ushtarake në një qendër të avancuar të arsimit, dijes dhe inovacionit.