Ministri i Shëndetësisë, Azir Aliu, vizitoi Klinikën Universitare për Sëmundje të Fëmijëve ku u hap Qendra për menaxhimin dhe trajtimin e obezitetit te fëmijët. Kjo qendër u krijua për të adresuar nevojën emergjente, pasi mbi 30% e fëmijëve në moshën 6 deri në 9 vjeç në Maqedoni kanë peshë të shtuar, ndërsa 14% vuajnë nga obeziteti ekstrem. Qendra ofron trajtim multidisiplinar me pediatër-endokrinologë, nutricionistë, psikologë dhe fiziatër, duke përdorur diagnostikë molekulare-gjenetike dhe ekzaminime të tjera të specializuara për të përcaktuar shkakun dhe për të hartuar plane individuale trajtimi. Shërbimet ofrohen përmes sistemit “Termini im”, ku mjeku amë ose pediatri evidenton gjendjen dhe drejton pacientët për trajtim specialistik në Departamentin e Endokrinologjisë.