Rreth 100 nxënës të klasave të VIII-ta dhe IX-ta nga komunat e Fushë Kosovës, Mitrovicës dhe Shtimes po marrin pjesë në një trajnim dyditor për kërkim-shpëtim dhe mbijetesë në natyrë, i organizuar në Qendrën e Kërkim-Shpëtimit në Berim, komunë e Zubin Potokut. Ky aktivitet zhvillohet në kuadër të Ditës Ndërkombëtare të Fëmijëve dhe përfshin ligjërata teorike dhe ushtrime praktike për reagim në situata emergjente, me pjesëmarrjen e strukturave të sigurisë dhe institucioneve të ndryshme. Kryeministri në detyrë Albin Kurti dhe ministri i Punëve të Brendshme Xhelal Sveçla theksuan rëndësinë e këtij trajnimi, i cili synon të përfshijë nxënës nga të gjitha komunat e Kosovës dhe të zhvillojë aftësitë e tyre në kërkim-shpëtim, ndihmë të parë dhe mbrojtje nga zjarri. Drejtoresha e Drejtorisë për Policimin në Komunitet, Zylfie Dema, u bëri thirrje nxënësve që të respektojnë rregullat e sigurisë gjatë qëndrimit në kamp, duke theksuar rëndësinë e bashkëpunimit dhe ndjekjes së udhëzimeve të zyrtarëve policorë dhe zjarrfikësve.