Kryetari i komunës së Prishtinës, Përparim Rama, ka njoftuar fillimin e punimeve për rimodelimin e nyjës rrugore në rrugën “Agim Ramadani”, në lidhje me rrugët “Qamil Hoxha” dhe “Rrustem Statovci”. Ky projekt përfshin vendosjen për herë të parë të semaforëve dhe sinjalizimit modern rrugor, që do të mundësojë qasje më të drejtpërdrejtë dhe më të sigurt në rrugët anësore. Sipas Ramës, ndryshimet do të sjellin një rrugë më të thjeshtë dhe më të shpejtë për përdoruesit. Ky investim synon përmirësimin e qarkullimit dhe rritjen e sigurisë në këtë nyje të rëndësishme rrugore të Prishtinës.