Nëntoger Kushtrim Fazliu nga Forcat e Sigurisë së Kosovës ka përfunduar me sukses Kursin e Inxhinierisë Ushtarake EBOLC në Shtetet e Bashkuara, një program i avancuar profesional i Ushtrisë amerikane. Ky kurs synon zhvillimin e aftësive udhëheqëse, taktike dhe teknike të oficerëve të inxhinierisë ushtarake, duke përfshirë planifikimin dhe zbatimin e operacioneve luftarake dhe komandimin e njësive në situata komplekse. Për shkak të performancës së tij të shkëlqyer, Fazliu është vlerësuar me dy çmime të rëndësishme: Distinguished Honor Graduate për rezultatet akademike më të larta ndër oficerët ndërkombëtarë dhe Iron Man Award për performancën e lartë fizike. Ky sukses nënvizon përgatitjen dhe profesionalizmin e oficerëve të FSK-së në arenën ndërkombëtare.