Parlamenti Europian ka miratuar një draftraport ku mirëpret angazhimin e Shqipërisë në rrugën drejt anëtarësimit në Bashkimin Europian, duke vlerësuar hapjen e të gjithë kapitujve të negociatave brenda 13 muajve dhe synimin për mbylljen e tyre deri në fund të vitit 2027. Raporti thekson nevojën për zbatim të plotë dhe të qëndrueshëm të reformave, veçanërisht në fushën e shtetit të së drejtës, ku sfidat kryesore mbeten efikasiteti i gjyqësorit, pavarësia institucionale dhe lufta kundër korrupsionit në nivele të larta. Sa i përket zgjedhjeve parlamentare të 11 majit 2025, PE vlerëson kuadrin ligjor si të përshtatshëm, por kërkon një reformë zgjedhore gjithëpërfshirëse dhe zbatim të rekomandimeve të OSBE/ODIHR. Gjithashtu, raporti shpreh shqetësim për polarizimin politik dhe kërkon forcim të transparencës dhe mbrojtje të lirisë së medias, pluralizmit dhe të drejtave themelore, ndërsa në aspektin socio-ekonomik evidentohen dobësi strukturore dhe mungesë progresi në mjedis dhe klimë. Mbështetja financiare e BE-së do të vazhdojë të jetë e lidhur ngushtë me arritjet konkrete në reforma.