Kryetari i Partisë Demokratike Popullore (DNP) në Mal të Zi, Milan Knezheviq, ka njoftuar nisjen e një beteje institucionale për anulimin e njohjes së pavarësisë së Kosovës nga Mali i Zi. Sipas tij, procesi do të fillojë më 12 maj në nivel lokal, me miratimin e një vendimi në Kuvendin Komunal të Zetës për “çnjohjen” e Kosovës, dhe pritet të përhapet në komunat e tjera me shumicë serbe. Knezheviq ka paralajmëruar gjithashtu paraqitjen e një rezolute në Kuvendin e Malit të Zi për të kërkuar tërheqjen e njohjes së Kosovës nga ana e shtetit malazez. Kjo iniciativë vjen në një kohë kur në Mal të Zi vazhdon debati mes forcave pro-euro-atlantike dhe atyre që kërkojnë lidhje më të ngushta me Serbinë dhe Rusinë.