Presidenti i Shqipërisë, Bajram Begaj, zhvilloi një takim me ministrin kroat të Punëve të Jashtme, Gordan Grlić-Radman, ku u diskutua mbi marrëdhëniet e ngushta dhe partneritetin strategjik mes dy vendeve. Në fokus ishte mbështetja e vazhdueshme e Kroacisë për integrimin evropian të Shqipërisë, si dhe bashkëpunimi në sektorë kyç si ekonomia, mbrojtja, energjia, infrastruktura dhe turizmi. Presidenti Begaj falënderoi Kroacinë për rolin e saj aktiv në promovimin e Shqipërisë dhe Kosovës në arenën ndërkombëtare dhe mori garanci për vijimin e mbështetjes në këtë proces. Gjithashtu, u theksua rëndësia e bashkëpunimit për paqen dhe stabilitetin në rajon, me Kroacinë që mbetet një aleat i fortë në këtë drejtim.