Ministrja e energjisë, Sanja Bozhinovska, zhvilloi një takim me të ngarkuarën me punë të Ambasadës së SHBA-së, Nicole Varns, ku u diskutua për avancimin e projekteve strategjike në sektorin e energjisë dhe harmonizimin e legjislacionit me standardet evropiane. Gjatë takimit u theksua rëndësia e pavarësisë energjetike si bazë për një shtet të qëndrueshëm dhe të begatë, si dhe u informua për ndërtimin e interkonektorit të gazit me Greqinë, i cili pritet të përfundojë në vitin 2027, dhe lidhjen e gazit me Serbinë që po ecën me ritëm të përshpejtuar. Ministrja vlerësoi këto projekte si kyçe për ndryshimin e panoramës energjetike në rajon, ndërsa u diskutua edhe anëtarësimi i Maqedonisë në Korridorin Vertikal të Gazit, një iniciativë evropiane për diversifikimin dhe stabilitetin energjetik në Evropën Juglindore, Qendrore dhe Lindore. Bozhinovska theksoi se investimi në energji është investim në të ardhmen dhe se përfitimet nga këto projekte do të jenë të dukshme dhe konkrete për qytetarët dhe shtetin.