Kryetari i Kuvendit të Shqipërisë, Niko Peleshi, mori pjesë në Samitin Parlamentar të Nismës së Tre Deteve në Zagreb, ku theksoi rëndësinë e ndërlidhjes infrastrukturore, energjetike dhe integrimit të Ballkanit Perëndimor në Bashkimin Evropian. Ai vuri në dukje se rajoni nuk duhet parë si periferi e Evropës, por si pjesë përbërëse e arkitekturës së ardhshme evropiane, duke përmendur projektet kyçe si korridori VIII, korridori Blu dhe gazsjellësit trans Adriatik dhe Joniano-Adriatik. Peleshi nënvizoi se Shqipëria po bëhet një nyje strategjike që lidh Adriatikun dhe Jonin me rrjetet evropiane, duke kontribuar në stabilitetin dhe zhvillimin ekonomik të rajonit. Ai theksoi gjithashtu se integrimi i Ballkanit Perëndimor në BE është një domosdoshmëri strategjike për sigurinë dhe stabilitetin e Evropës, dhe roli i Shqipërisë si faktor stabiliteti në rajon është kyç për forcimin e projektit evropian.