Lista preliminare e Akademisë Ushtarake në Shkup për pranimin e kadetëve të rinj përmban 46 kandidatë, por vetëm një prej tyre është shqiptar. Aleanca për Shqiptarët e konsideron këtë situatë si dëshmi të përfaqësimit të pamjaftueshëm të shqiptarëve në institucionin që përgatit kuadrot e ardhshme të Forcave të Armatosura. Ata kritikojnë VLEN-in, pjesë e Qeverisë dhe Ministrisë së Mbrojtjes, për mungesë angazhimi dhe heshtje në rritjen e përfaqësimit të të rinjve shqiptarë në sektorin e mbrojtjes. ASH kërkon sqarim të menjëhershëm nga Ministria e Mbrojtjes dhe Akademia Ushtarake, si dhe përgjegjësi politike nga përfaqësuesit shqiptarë në Qeveri, duke theksuar se shqiptarët kërkojnë përfaqësim të drejtë dhe dinjitoz, jo privilegje.