Kryetari i Komunës së Mitrovicës, Faton Peci, ka njoftuar për përfundimin e asfaltimit të rrugës “Driton M. Veliu” në lagjen Iliridë, e cila lidh rrugët “Ukshin Kovaçica” dhe “Safet Boletini”. Rruga tashmë është e gatshme për qarkullim dhe pritet të përmirësojë lëvizjen dhe sigurinë për qytetarët në këtë pjesë të qytetit. Peci ka theksuar se investimet në infrastrukturën rrugore nuk do të ndalen, duke vijuar me asfaltimin e rrugëve në pjesë të ndryshme të komunës. Ai ka premtuar se do të punohet në mënyrë të vazhdueshme për të përmirësuar kushtet e qarkullimit rrugor në të gjitha lagjet e Mitrovicës.