Drejtori i Drejtorisë për Mbrojtje dhe Shpëtim, Stojançe Angelov, njoftoi se gjendja e krizës me ujin e pijshëm në Gostivar ka përfunduar dhe uji tani është i pastër dhe i sigurt për konsum. Kriza 30-ditore u shpall më 20 korrik pas ndotjes së ujit dhe epidemisë që preku mijëra qytetarë, ndërsa uji ishte ndaluar për pije që nga 17 korriku. Ndotja u shkaktua nga vendosja e parregullt e pompave nga NP “Komunalec”-Gostivar, që futën ujë të ndotur në sistem, duke shkaktuar helmime masive. Me përfundimin e krizës, institucionet qendrore dhe ndërmarrjet shtetërore tërhiqen nga kontrolli i cilësisë së ujit, duke kaluar përgjegjësinë te pushteti lokal për të siguruar vazhdimësinë e ujit të pastër për banorët.