Personeli i Regjimentit të Këmbësorisë së Jugut të Forcës Tokësore të Shqipërisë po zhvillon fazën e fundit të përgatitjeve në Kosovë për pjesëmarrjen në garën ndërkombëtare “Cambrian Patrol”. Trajnimi është realizuar në bashkëpunim me Forcën e Sigurisë së Kosovës dhe personel britanik, me fokus në forcimin e ndërveprueshmërisë, shkëmbimin e përvojave profesionale dhe përgatitjen për skenarë të ndryshëm të garës. Kjo garë konsiderohet një nga më të vështirat në botë për patrullimin ushtarak, ku vitin e kaluar ekipi shqiptar u vlerësua me medalje bronzi, ndërsa ai i Kosovës fitoi medaljen e argjendtë. Edicioni i këtij viti do të zhvillohet në Mbretërinë e Bashkuar në tetor, dhe përgatitjet në Kosovë janë një fazë kyçe për zhvillimin e aftësive taktike, qëndrueshmërisë fizike dhe mendore të pjesëmarrësve.