Ministri në detyrë i Infrastrukturës, Dimal Basha, ka njoftuar për përfundimin e punimeve infrastrukturore në dy pika kyçe të Prishtinës: “Rrethi i Ismetit” dhe nënkalimin e Mazgitit. Në “Rrethi i Ismetit” janë sanuar dëmtimet në rrjetin nëntokësor, duke eliminuar rrjedhjen e ujit që dëmtonte rrugën, si dhe është asfaltuar rruga dhe realizuar një kyçje e re për Forcën e Sigurisë së Kosovës. Ndërsa në nënkalimin e Mazgitit, pas ndërhyrjeve për trajtimin e grumbullimit të ujërave dhe sanimit të gropave, është përfunduar asfaltimi i kësaj pjese të rrugës. Basha ka falënderuar qytetarët për mirëkuptimin gjatë punimeve dhe ka theksuar se institucionet do të vazhdojnë të punojnë për zgjidhje të qëndrueshme në infrastrukturën rrugore. Këto ndërhyrje synojnë përmirësimin e kushteve të qarkullimit dhe eliminimin e problemeve që dëmtonin rrugët në qytet.