Kryeministri i Malit të Zi, Milojko Spajiq, ka reaguar ndaj akuzave të presidentit serb Aleksandar Vuçiq, duke theksuar se Mali i Zi nuk kërkon konflikt me Serbinë, por marrëdhënie të mira fqinjësore dhe një politikë të qartë evropiane. Spajiq e kritikoi Vuçiqin për rolin që po luan si “PR-i i Rusisë” dhe për standardet e dyfishta lidhur me dërgimin e armëve, duke vënë në dukje se Serbia është një nga burimet kryesore të armëve për Ukrainën, ndërkohë që dërgon mesazhe të ndryshme Moskës dhe Evropës. Përplasja mes dy vendeve u intensifikua pas akuzave të Vuçiqit se Mali i Zi po ndjek një politikë antiserbe dhe po tenton “riedukimin” e serbëve në Mal të Zi. Shtimi i tensioneve u pasua edhe nga vendimi i Podgoricës për të dërguar një përfaqësues diplomatik në Knin gjatë përvjetorit të operacionit kroat “Oluja”, një vendim që Vuçiq e kritikoi ashpër.