Nënkryetari i BDI-së, Bujar Osmani, ka reaguar pas deklaratave të zv.ministres së Transportit nga VLEN, Kaltrina Zekolli Shqiri, e cila akuzoi BDI-në për përdorimin politik të projektit të autostradës Shkup-Bllacë. Osmani theksoi se e gjithë procedura për ndërtimin e autostradës është realizuar gjatë qeverisjes së BDI-së, duke përfshirë financimin, dokumentacionin, shpronësimet dhe tenderimin. Ai shtoi se VLEN nuk ka bërë asnjë hap konkret për avancimin e projektit gjatë dy viteve të fundit, madje ka tentuar ta bllokojë dhe devijojë trasenë. Për më tepër, ndërtimi i segmentit të parë prej 2 kilometrash nga BDI-ja ka penguar kthimin e projektit nga autostradë në rrugë magjistrale, duke i mohuar kështu VLEN-it çdo meritë në këtë proces.