Bashkimi Demokratik për Integrim (BDI) ka reaguar ashpër ndaj marrëveshjes së propozuar nga zëvendësministri i Arsimit, Driton Sulejmani, lidhur me regjistrimin e nxënësve shqiptarë në shkollën “Petar Zdravkovski – Penko” në komunën e Butelit. Sipas kësaj marrëveshjeje, nxënësit shqiptarë do të pranohen në klasat e para vetëm nëse kanë vëlla apo motër që tashmë ndjek mësimin në këtë shkollë, duke mos parashikuar hapjen e një paraleleje të re në gjuhën shqipe. BDI e konsideron këtë një praktikë diskriminuese dhe joligjore, që kufizon të drejtën e fëmijëve shqiptarë për arsim në gjuhën amtare dhe kërkon nga institucionet të publikojnë kriteret e përzgjedhjes dhe numrin e nxënësve të regjistruar.