Në Aeroportin Ndërkombëtar të Vlorës vijojnë tensionet dhe bllokimet e punimeve për të dytën ditë me radhë, për shkak të një konflikti mes dy kompanive kryesore që operojnë në projekt, “Mabco” e Behgjet Pacollit dhe “2A Group” e Valon Ademisë. Përplasja për administrimin dhe kontrollin e kantierit ka sjellë ndërhyrjen e policisë dhe ndalimin e hyrjes së punonjësve dhe nënkontraktorëve, të cilët ankohen se po penalizohen pavarësisht se punimet janë në fazën përfundimtare dhe aeroporti pritet të dorëzohet brenda pak ditësh. Konflikti juridik mes palëve ka nisur që në vjeshtën e vitit 2025 dhe lidhet me aksionet dhe marrëveshjet e paqarta për administrimin e projektit, duke përfshirë edhe çështje financiare dhe vendime gjyqësore që kanë dhënë masa kufizuese dhe njohje të përkohshme të të drejtave. Deri tani nuk ka një zgjidhje konkrete, ndërsa bllokimi i kantierit rrezikon të vonojë përfundimin e aeroportit dhe penalizon dhjetra kompani dhe punonjës të përfshirë në projekt.