Në fshatin Kopiliq i Epërm është përuruar një pllaka përkujtimore që shënon vendin ku gjatë periudhës mars 1998 – 1999 ka funksionuar shtabi i togut të parë të Ushtrisë Çlirimtare të Kosovës. Kjo shtëpi ka qenë vendi ku janë marrë vendime të rëndësishme për organizimin dhe zhvillimin e luftës çlirimtare, duke përfshirë strukturën e Brigadës 112 “Arben Haliti”, Batalionin II, Kompaninë I. Pllaka u vendos nga Organizata e Veteranëve të Luftës së UÇK-së si një shenjë nderimi për familjen Abazi dhe të gjithë ata që kontribuan në këtë kauzë. Në ceremoni morën pjesë figura të larta institucionale nga Komuna e Skenderajt, përfaqësues të OVL-së dhe ish-luftëtarë, ndërsa familjarët shprehën emocionet dhe lumturinë për rolin e tyre në luftën për liri.