Komisioni për Çështje të Zgjedhjeve dhe Emërimeve zhvilloi intervistat me pesë kandidatët për anëtar të Komisionit Shtetëror për Parandalimin e Korrupsionit. Kandidatët paraqitën vizionet dhe përvojat e tyre profesionale, duke u përgjigjur edhe në pyetjet e deputetëve dhe përfaqësuesve të organizatave joqeveritare. Mbledhjen e hapi kryetarja Gjorgjija Sajkoski, ndërsa intervistat i drejtuan kryetari i Komisionit të Përzgjedhjes, Igor Zdravkovski dhe anëtarët e tjerë. Brenda tre ditësh pritet të përgatitet rang-lista e kandidatëve, e cila më pas do t’i dorëzohet Kuvendit për vendimmarrje.