Federata e Peshkatarëve në Kosovë ka vendosur pezullimin përkohshëm të peshkimit të krapit në të gjitha liqenet dhe lumenjtë e vendit, duke filluar nga 15 prilli deri më 31 maj 2026. Gjatë kësaj periudhe, peshkimi do të lejohet vetëm në formën “Peshko dhe Lësho”, pa mundësi për të mbajtur peshkun, me qëllim rigjenerimin dhe mbrojtjen e popullatës së krapit gjatë sezonit të shumimit. Shoqatat e peshkatarëve sportivë dhe rekreativë janë të detyruara të respektojnë këtë vendim, ndërsa rojet federative do të monitorojnë terrenin dhe do të ndërmarrin masa disiplinore ndaj shkelësve. Ky vendim synon të sigurojë një ekuilibër të qëndrueshëm të peshkut dhe të mbrojë burimet natyrore të Kosovës.