Plazhet përgjatë bregut të Liqenit të Strugës funksionojnë prej rreth dhjetë vitesh pa koncesion, pasi kontratat për menaxhimin e tyre kanë skaduar që në vitin 2016. Komuna e Strugës, sipas kryetarit Mendi Qyra, humb të ardhura prej të paktën gjysmë milioni euro, pasi plazhet nuk paguajnë asnjë taksë për përdorimin e hapësirave publike. Gjatë kësaj periudhe janë ndërtuar edhe objekte të ndryshme, përfshirë ndërtime të forta, duke krijuar një situatë kaotike dhe urbanizim të pakontrolluar në bregun e liqenit. Kryetari Qyra ka propozuar një vendim për menaxhimin e plazheve që do të mundësonte mbledhjen e të ardhurave dhe rregullimin ligjor të hapësirave, ndërsa kryetari i Këshillit të Komunës, Mite Stefovski, thekson se zgjidhja kërkon bashkëpunim dhe konsultime me institucionet shtetërore për të adresuar problemin e krijuar gjatë dekadës së fundit.