Para derbit të 180-të mes Crvena Zvezdës dhe Partizanit në Superligën e Serbisë, tifozët e Partizanit nisën thirrje në mbështetje të Ratko Mlladiqit, ish-komandantit të Ushtrisë së Republikës Srpska dhe kriminelit të dënuar nga Gjykata e Hagës për krime lufte dhe gjenocid. Në stadiumin “Rajko Mitiq” u mbajt një minutë heshtje në nderim të tij, e shoqëruar me koreografi në tribunat e stadiumit, duke shkaktuar reagime të ashpra në opinionin publik. Mlladiqi është përgjegjës për krimet më të rënda gjatë luftës në Bosnje, përfshirë masakrën në Srebrenicë ku u vranë mbi 8 mijë burra dhe djem boshnjakë. Kjo ngjarje është parë si një tjetër shembull i atmosferës tensionuese që shpesh shoqëron derbin më të madh të futbollit serb.