Kreu i Këshillit Kombëtar Shqiptar në Luginën e Preshevës, Enkel Rexhepi, ka pranuar procedurën e kundërvajtjes ndaj tij dhe KKSh-së për shkak të vendosjes së flamurit shqiptar në një aktivitet përkujtimor në Bujanoc, në nderim të ish-kryetarit të KKSh-së, Jonuz Musliu. Në këtë aktivitet, flamuri i Shqipërisë ishte i vendosur në skenë pa praninë e flamurit të Serbisë, çka sipas autoriteteve serbe përbën kundërvajtje. Rexhepi ka theksuar se flamuri kuq e zi nuk është provokim, por shprehje e identitetit dhe dinjitetit shqiptar, duke shtuar se kjo është hera e tretë që ai thirret për këtë çështje, ndërsa institucioni që ai përfaqëson është ballafaquar me këtë problem për herë të dymbëdhjetë. Ai ka deklaruar se do të vazhdojnë ta mbrojnë të drejtën për përdorimin e simboleve kombëtare me vendosmëri dhe dashuri.