Presidenti i Kroacisë, Zoran Milanović, ka anuluar samitin e Procesit “Brdo-Brijoni” që ishte planifikuar të mbahej në maj në Kroaci, duke theksuar se nuk ekzistojnë kushtet që presidenti i Serbisë, Aleksandar Vučić, të marrë pjesë. Milanović argumenton se deklaratat dhe veprimet e Vuçiçit në javët e fundit janë në kundërshtim me qëllimet e këtij procesi dhe rrezikojnë paqen dhe stabilitetin në Evropën Juglindore. Procesi “Brdo-Brijoni” është një iniciativë e Kroacisë dhe Sllovenisë që synon të përmirësojë bashkëpunimin rajonal dhe integrimin evropian të vendeve të Ballkanit Perëndimor, ndërsa samiti i fundit u mbajt në Tiranë me pjesëmarrjen e të gjithë presidentëve të rajonit, përfshirë edhe Vuçiçin. Në sfond të tensioneve, Vuçiç dhe mediat serbe kanë nisur një fushatë kundër Kroacisë, duke e akuzuar për plane destabilizuese ndaj Serbisë, ndërsa Kroacia prej vitesh nuk e ka ftuar Vuçiçin për vizita zyrtare apo private.