Komuna e Prishtinës ka përkujtuar vizitën historike të senatorit amerikan Bob Dole më 29 gusht 1990, në një periudhë shumë të vështirë për shqiptarët e Kosovës. Kryetari i Prishtinës, Përparim Rama, së bashku me delegacionin komunal, ka bërë homazhe pranë shtatores së Bob Dole, duke vlerësuar rolin e tij në ndërkombëtarizimin e çështjes së Kosovës dhe përpjekjet për të sjellë zërin e shqiptarëve në arenën ndërkombëtare. Gjatë vizitës, delegacioni amerikan u përball me represionin dhe situatën e rëndë politike në Kosovë, ndërkohë që mijëra qytetarë protestonin për liri dhe të drejta. Komuna e Prishtinës e cilëson senatorin Bob Dole si një mik të madh të Kosovës dhe shpreh mirënjohje të përjetshme për kontributin e tij në mbështetjen e kauzës shqiptare.