Në Mitrovicën e Veriut ka nisur protesta e studentëve dhe profesorëve të Fakultetit të Shkencave Teknike, të cilët kundërshtojnë kërkesën e Universitetit të Prishtinës për lirimin e hapësirave që ata përdorin. Universiteti i Prishtinës ka dhënë një afat 30-ditor për largimin nga këto hapësira, përndryshe do të fillojë të kërkojë pagesën e qirasë. Fakulteti i Shkencave Teknike në Mitrovicë funksionon brenda sistemit universitar të Serbisë, ndërsa Universiteti i Prishtinës kërkon lirimin e pronës sipas ligjeve dhe procedurave të Kosovës. Rektori Arben Hajrullahu ka theksuar se universiteti është i përkushtuar të përdorë të gjitha hapësirat e tij pa vonesa të mëtejshme.