Dhjetra banorë të Rugovës protestuan në hyrje të qytetit, duke kundërshtuar vendimin e ministres së Mjedisit, Fitore Pacolli, për ndalimin e aktiviteteve ndërtimore në Parqet Kombëtare “Bjeshkët e Nemuna” dhe “Sharri”. Protestuesit kërkuan rishqyrtim të vendimit dhe më shumë sqarime, duke argumentuar se kjo masë ndikon negativisht në zhvillimin dhe investimet në zonat e tyre. Ministrja Pacolli njoftoi se ndalohet çdo aktivitet ndërtimor pa leje brenda këtyre parqeve, si dhe qarkullimi i mjeteve që transportojnë materiale ndërtimore ose makineri të rënda pa autorizim të posaçëm. Ajo theksoi se ky vendim është i domosdoshëm për rikthimin e ligjshmërisë dhe mbrojtjen e zonave të mbrojtura, ndërsa institucionet do të monitorojnë zbatimin e tij në mënyrë rigoroze.