Mevlan Ademi nga Lëvizja Studentore Shqiptare ka reaguar ashpër ndaj vonesave në zgjidhjen e organizimit të provimit të jurisprudencës në gjuhën shqipe, duke theksuar se premtimi për zgjidhje brenda një jave është zvarritur në më shumë se gjashtë muaj. Ai kritikoi idenë e zhvillimit të provimit me metodën "gjysëm shqip, gjysëm maqedonisht", duke e quajtur këtë një mohim të së drejtës së studentëve për të dhënë provimin në gjuhën amtare. Sipas tij, çdo muaj vonesë sjell qindra të rinj që mbeten në pritje dhe diplomohen pa mundësinë e provimit në shqip, duke dëmtuar gjenerata të tëra juristësh. Kërkesa e Lëvizjes Studentore mbetet e pandryshuar: zbatim i plotë dhe i menjëhershëm i Ligjit të Gjuhës dhe zhvillimi i provimeve tërësisht në gjuhën shqipe, pa zvarritje dhe premtime boshe.