Punimet në kyçjen e Mazgitit po vazhdojnë me intensitet të lartë, ndërsa autoritetet po përpiqen të stabilizojnë situatën dhe të garantojnë sigurinë e qarkullimit për qytetarët. Ky segment rrugor, i rehabilituar në vitin 2023 dhe riparuar sërish në vitin 2025, ka përsëri dëmtime, të cilat dyshohet se janë shkaktuar nga depërtimi i ujërave nën rrugë në zonën ku kalojnë gypat e ujësjellësit të KRU "Prishtina". Ministri në detyrë i Infrastrukturës dhe Transportit, Dimal Basha, ka theksuar se po vazhdon analiza në bashkëpunim me KRU "Prishtina" për të identifikuar dhe eliminuar shkakun e dëmtimeve në mënyrë përfundimtare. Ndërkohë, është ndërmarrë një ndërhyrje e përkohshme për të siguruar qarkullimin e sigurt deri në gjetjen e një zgjidhjeje afatgjatë dhe të qëndrueshme për këtë nyje rrugore.