Komuna e Prishtinës ka njoftuar se nga 22 korriku do të mbyllet për pesë ditë segmenti i rrugës “Ilir Konushevci” nga kryqëzimi me rrugën “Lidhja e Prizrenit” deri te kryqëzimi me rrugën “Vëllezërit Fazliu”, për shkak të punimeve infrastrukturore. Kjo mbyllje vjen në një periudhë me fluks të lartë trafiku, pasi është piku i sezonit dhe kolonat janë të gjata për shkak të ardhjes së mërgimtarëve në Kosovë. Për të shmangur vonesat, Komuna ka rekomanduar disa rrugë alternative si “Maliq Pashë Gjinolli” përmes “Bajram Bahtirit”, Unaza Qendrore dhe “Zagrebi” përmes “Vëllezërit Fazliu”, si dhe “Murat Mehmeti” me dalje në “Lidhja e Prizrenit”. Pavarësisht sezonit të ngarkuar, punimet vazhdojnë dhe ndikojnë në rritjen e kolonave, ndërsa Komuna falënderon qytetarët për mirëkuptimin dhe bashkëpunimin.