Nënkryetarja e Komunës së Prishtinës, Besianë Musmurati, ka njoftuar se punimet për ndërtimin e shkollës së re në lagjen Sofali po intensifikohen me qëllim përfundimin sa më të shpejtë të projektit. Ajo së bashku me bashkëpunëtorët e saj ka vizituar kantierin për të parë nga afër ecurinë e punimeve dhe ka kërkuar përshpejtimin e tyre. Musmurati ka theksuar se investimet në arsim mbeten një nga prioritetet kryesore të komunës, duke e konsideruar arsimin si një investim në të ardhmen e Prishtinës. Synimi është që nxënësit të kenë sa më parë në dispozicion një ambient të ri dhe modern për mësim.