Në Shqipëri ka hyrë në fuqi vendimi i qeverisë që përcakton modelin tip të marrëveshjes mes Agjencisë Kombëtare të Bregdetit dhe investitorëve strategjikë për përdorimin e brigjeve të deteve, liqeneve dhe lumenjve si stacione plazhi. Kjo marrëveshje synon administrim më të rregullt të hapësirave publike bregdetare, garantimin e sigurisë për pushuesit dhe mbrojtjen e mjedisit. Tarifa për përdorimin e këtyre hapësirave do të jetë e njëjtë me atë të përcaktuar nga këshilli bashkiak përkatës dhe do të indeksohet çdo vit sipas normës së inflacionit, ndërsa pagesa bëhet çdo vit në muajin tetor. Në rast shkeljesh dhe prishjeje të kontratës, investitorët rrezikojnë gjoba deri në 4 mijë euro dhe masa të tjera administrative, ndërsa të ardhurat nga këto marrëveshje do të shkojnë direkt për bashkitë ku ndodhen investimet.