Ministria e Punëve të Brendshme ka vënë në funksion kamerat e sistemit “Qyteti i Sigurt” në segmentin e autostradës ndërmjet fshatrave Gorenicë dhe Trebenishtë në komunën e Debërcës. Ky sistem do të monitorojë trafikun në mënyrë më të rreptë dhe të vazhdueshme, duke ndihmuar në zbulimin e shkeljeve të rregullave të komunikacionit dhe në rritjen e sigurisë rrugore. Së shpejti, kamerat do të fillojnë të funksionojnë edhe në rrugët e Ohrit dhe rajonit përreth, pasi janë instaluar dhe po përfundojnë testimet teknike. MPB u bën thirrje drejtuesve të automjeteve të respektojnë rregullat e komunikacionit për të kontribuar në uljen e aksidenteve dhe për të siguruar rrugë më të sigurta.