Milan Radojçiq, i akuzuari kryesor për sulmin terrorist në Banjskë të Zveçanit më 24 shtator 2023, është parë në tubimin e organizuar nga presidenti serb Aleksandër Vuçiq më 27 qershor në Beograd. Pamjet e publikuara në rrjetet sociale dhe faqet serbe kanë tërhequr vëmendje, pasi Radojçiq është i kërkuar nga autoritetet e Kosovës me urdhër arrest ndërkombëtar dhe është në listën e zezë të SHBA-së për krim të organizuar dhe korrupsion. Në tubim, Vuçiq mbajti një fjalim me tone nacionaliste, duke përsëritur pretendimet e Serbisë ndaj Kosovës dhe duke paralajmëruar demonstrimin e forcës ushtarake gjatë aktiviteteve të Vidovdanit. Kjo shfaqje e Radojçiqit pranë Vuçiqit vjen në një moment kur Bashkimi Evropian, SHBA dhe NATO kërkojnë nga Serbia dorëzimin e tij dhe të grupit që kreu sulmin në veri të Kosovës, duke theksuar tensionet e thella në rajon.