Kryeministri Edi Rama deklaroi se qeveria shqiptare do të ndërhyjë në tregun e naftës përmes krijimit të një kompanie publike, me qëllim që qytetarët të mos paguajnë më shumë se sa u takon dhe për të rritur transparencën në këtë sektor. Ai theksoi se rritja e çmimeve të naftës është rezultat i krizës ndërkombëtare dhe problemeve të brendshme të tregut, përfshirë informalitetin dhe mungesën e kontrollit. Rama njoftoi gjithashtu përgatitjen e kuadrit ligjor për rezervat strategjike të karburanteve dhe prezantoi masa për përmirësimin e koncesionit të markimit të naftës, duke përdorur një ngjyrues të ri të pamanipulueshëm. Ai shtoi se kompania publike do të ndjekë edhe naftën tranzit që hyn në Shqipëri dhe do të vendosë rregulla të lojës me çmime të bazuara në bursë, duke lejuar fitime të arsyeshme për distributorët, por duke parandaluar stërfitimet.