Kryetari i AAK-së, Ramush Haradinaj, mori pjesë në varrimin e Dom Kelmend Spaqit, priftit katolik që njihet për veprimtarinë e tij atdhetare dhe mbrojtjen e civilëve shqiptarë gjatë luftës në Kosovë. Dom Kelmend Spaqi strehoi me qindra shqiptarë myslimanë në Kishën e “Shna Ndout” në Gllogjan, duke refuzuar t’i ndante sipas besimit dhe duke u përballur me forcat paramilitare serbe për t’i mbrojtur ata. Ai madje u desh të paguante paramilitarët për t’ua shpëtuar jetën njerëzve që kish strehuar, duke treguar guxim dhe humanizëm të jashtëzakonshëm. Haradinaj përkujtoi veprën e tij duke thënë se shërbimi ndaj atdheut nderohet përjetë, ndërsa mediat ndërkombëtare, si “Sky News”, kishin raportuar më parë për këtë akt heroik të Dom Kelmend Spaqit.