Instituti i Shëndetit Publik në Maqedoninë e Veriut ka konfirmuar rastin e parë të infeksionit me virusin Zika në vend. Pacienti, një shtetas maqedonas, u infektua gjatë qëndrimit në Maldive, ku u pickua nga një mushkonjë. Pas kthimit në vend, ai u paraqit në Klinikën për Sëmundje Infektive dhe më 17 qershor u konfirmua pozitiviteti për virusin Zika nga Departamenti i Virologjisë pranë ISHP-së. Autoritetet shëndetësore kanë ndërmarrë masa parandaluese, duke përfshirë anketa epidemiologjike, dezinfektim të zonës dhe rekomandime për parandalimin e transmetimit seksual të virusit, ndërsa u bëjnë thirrje qytetarëve të kërkojnë ndihmë mjekësore në rast të simptomave pas pickimit nga mushkonjat, sidomos nëse kanë udhëtuar në zona tropikale.