Komuna e Tetovës dhe SPB Tetovë kanë vendosur masa të përkohshme sigurie dhe një regjim të veçantë trafiku për shkak të vizitës së presidentit të Shqipërisë, Bajram Begaj, në Tetovë. Në disa rrugë kryesore të qytetit, përfshirë bulevardet “Marshall Tito” dhe “Bllagoja Toska”, si dhe rrugët “JNA”, “Ilindenska”, “Kiro Ristoski-Drnc”, “VonVardarska” dhe “172”, do të ndalohet parkimi dhe do të ketë kufizime trafiku. Automjetet që do të parkojnë në kundërshtim me këto masa do të largohen nga shërbimet përkatëse. SPB Tetovë apelon për respektimin e urdhrave të policisë për të siguruar qarkullim të sigurt dhe të pandërprerë gjatë vizitës zyrtare disa-ditore të presidentit Begaj, i cili u prit me nderime shtetërore dhe ushtarake nga presidentja Gordana Siljanovska-Davkova.