Në Kosovë, numri i nxënësve ka rënë me rreth 35 mijë gjatë gjashtë viteve të fundit, duke lënë bankat e shkollave gjithnjë e më bosh. Ekspertët e arsimit fajësojnë sistemin e dobët arsimor, i cili sipas tyre nuk përgatit si duhet nxënësit dhe ka humbur besimin e prindërve, të cilët kërkojnë mundësi jashtë vendit. Ndër faktorët që ndikojnë në këtë trend përmendet edhe emigrimi i familjeve dhe rënia e natalitetit, megjithëse ky i fundit ka një peshë më të vogël. Njohësit e arsimit sugjerojnë riorganizimin e rrjetit shkollor dhe planifikim bazuar në të dhënat demografike, por Ministria e Arsimit ende nuk ka dhënë një përgjigje konkrete për adresimin e këtij problemi.