Më 18 qershor 2014, një ditë pas heqjes së barrikadës mbi urën kryesore të Ibrit në Mitrovicë, serbët e veriut ribllokuan urën me një barrikadë të re të quajtur “Parku i Paqes”. Ky veprim u koordinua nga kryetari i Mitrovicës së Veriut, Goran Rakiq, në bashkëpunim me qeverinë e Serbisë, ndërsa shefi i zyrës serbe për Kosovën, Marko Gjuriq, ishte prezent gjatë aksionit. Forcat policore nuk ndërhynë për të ndaluar bllokimin, ndërsa Rakiq ftoi kryetarin e pjesës jugore, Agim Bahtiri, që pjesën tjetër të urës ta shndërrojë gjithashtu në park. “Parku i Paqes” u hoq më 14 gusht 2016, pas implementimit të marrëveshjes së dialogut Beograd-Prishtinë për urën në Mitrovicë.